සමාජ සේවා දෙපාර්තමේන්තුව ස්ථාපිත කරන ලද්දේ 1948 දී ය.  ශ්‍රී ලංකාවේ දිස්ත්‍රික් පරිපාලන ඒකකය වු කච්චේරි සංකීර්ණ ආශ්‍රිතව සමාජ  සේවා  දෙපාර්තමේන්තුව මඟින් විශේෂ සමාජ සේවා අංශයක් ප්‍රතිලාභී ජනතාවගේ සුබසාධන කටයුතු පහසු කිරීමේ අරමුණින් පවත්වා ගෙන යන ලදි.

1987 වර්ෂයේ 13 වන ආණ්ඩුක්‍රම ව්‍යවස්ථාව සංශෝධනයෙන් පසුව පළාත් සභා ක්‍රමය ආරම්භ විමත් සමඟ පරිපාලන දිස්ත්‍රික්කවල බලය පළාත් සභාව මූලික කර ගනිමින් කේන්ද්‍රගත වීමත් සමඟ බස්නාහිර පළාතේ කොළඹ වේල්ල වීදියේ පැවති කච්චේරි සංකීර්ණයේ සමාජ සේවා අංශය 1989 වර්ෂයේ දී බස්නාහිර පළාත් සමාජ‍ සේවා දෙපාර්තමේන්තුව වශයෙන් ස්ථාපිත විය.

පළාත් සමාජ සේවා දෙපාර්තමේන්තුව ආරම්භක අධ්‍යක්‍ෂ ධූරය දැරැවේ ප්‍රමිලා විතාන මහත්මිය විසිනි. මෙම කාල වකවානුවේදී එක් සමාජ සේවා නිලධාරියෙකු ඇතුළු දස දෙනකුගෙන් කාර්ය මණ්ඩලය සමන්විතවිය.

පළාත් සභා ක්‍රමය ආරම්භ වීමත් සමගම රේඛීය සමාජ සේවා දෙපාර්තමේන්තුවෙන් එතෙක් ක්‍රියාත්මක කළ සුබසාධන කටයුතු පළාත් සභාවේ පාලනය යටතේ, පළාත් සමාජ සේවා දෙපාර්තමේන්තු‍වෙන් ක්‍රියාත්මක කිරීමට බලය පැවරින. ඒ අනුව මහජනාධාර, අනියම් සහනාධාර, ආබාධිත හා වැඩිහිටි නිවාස සඳහා නඩත්තු ආධාර , යාථායෝග්‍යාධාර, ආබාධිත උපකරණ ලබාදීම ( කිහිලි කරු, රෝද පුටු, ‍ත්‍රෛයිසිකල්, ශ්‍රවන උපකරණ, ඇස් කණ්ණාඩි ආදිය) පළාත් සමාජ සේවා දෙපාර්තමේන්තු වැය ශීර්ෂ යටතේ, පළාත් සමාජ සේවා දෙපාර්තමේන්තුවේ අනුමැතියෙන් නිකුත් කිරීම ආරම්භ වී ඇත.

ප්‍රමිලා විතාන මහත්මියගෙන් අනතුරුව බස්නාහිර පළාත් සමාජ සේවා දෙපාර්තමේන්තුවේ අධ්‍යක්‍ෂ ධූරයට පත්වුයේ දයා පීරිස් මහත්මියයි.

ඉන්පසු බස්නාහිර පළාත් සමාජ සේවා දෙපාර්තමේන්තුවේ අධ්‍යක්‍ෂ ධූරය එස්.කේ. වීරතුංග මහත්මිය භාරගන්නා ලදි. එතුමිය වැල්ලවත්තේ රෙදි මෝල අසල පිහිටි (බෝධිය වටරවුම ඉදිරිපිට) බස්නාහිර පළාත් සමාජ සේවා දෙපාර්තමේන්තු කාර්යාලයේ රාජකාරී කටයුතු ක්‍රියාත්මක කරන ලදි. මෙම කාල වකවානුවේ දෙපාර්තමේන්තු කාර්ය මණ්ඩලය 15 ක් වූ අතර සමාජ සේවා නිලධාරීන් 15 ක් බදවා ගෙන ඇත.

1997.02.02 දින සිට 2001.03.04 දින දක්වා බස්නාහිර පළාත් සමාජ සේවා දෙපාර්මේන්තුවේ අධ්‍යක්‍ෂක වශයෙන් කටයුතු කරන ලද්දේ ජී.එස්.කේ.කන්නන්ගර මහතාය. එතුමාගේ ධුර කාලයෙදී 1999 මැයි මාසයේ වැල්ලවත්ත රෙදිමෝල අසල බෝධිය වටරවුම ඉදිරිපිට පැවති සමාජ සේවා දෙපාර්තමේන්තු කාර්යාලය, බම්බලපිටිය සියෙස්ටා ගොඩනැගිල්ලට ගෙනයන ලදි. බස්නාහිර පළාත් සමාජ සේවා දෙපාර්මේන්තුවට ආයතනික වශයෙන් සමාජ සේවා නිලධාරීන් 20 කට වැඩි පිරිසක් බදවා ගන්නා ලදි. (උපාධිධාරී අභ්‍යාසලාභී වශයෙන්) 1999 මැයි මාසයේ බස්නාහිර පළාත් සමාජ සේවා අමාත්‍යංශයේ අංශයක් වශයෙන් බස්නාහිර පළාත් සමාජ සේවා දෙපාර්මේන්තුව වෙන් කර, වෙනම ගිණුම් කටයුතු පවත්වාගෙන යාම ආරම්භ කරන ලද්දේ මේ කාලයේය. මෙම වකවානුවේම දෙපාර්තමේන්තු කාර්යාලය නාරහේන්පිට, නාවල “ටකාශි” ගොඩනැගිල්ලට ගෙන එන ලදි. බස්නාහිර පළාත් සමාජ සේවා අධ්‍යක්‍ෂක ජී.එස්.කේ.කන්නන්ගර මහතා හා සමාජ සේවා නිළධාරීණී ප්‍රියානි සුසන්ත්‍රා මහත්මියගේ සහයෝගයද ඇතිව බෙල්ලන්තර රජයේ විශේෂිත ආබාධිත ගැහැණු ළමා නිවාසය ආරම්භ කිරිම විශේෂ රාජකාරියකි. ගරු අමාත්‍ය විරන්ත ප්‍රනාන්දු මැතිතුමාගේ අනුග්‍රහය සහිතව වැන්දඹු මවිවරුන්  වෙනුවෙන් සුවශක්‍ති මාතා වැඩසටහන ආරම්භ කරන ලදි.

බස්නාහිර පළාත් සමාජ සේවා දෙපාර්මේන්තුවේ පස්වන අධ්‍යක්‍ෂ වරයා වශයෙන් පත්වුයේ ජී.ඒ ඥානවීර මහතාය.

අධ්‍යක්‍ෂ ජී.ඒ. ඥානවීර මහතාගේ ඇවෑමෙන් පසු බස්නාහිර පළාත් සමාජ සේවා දෙපාර්මේන්තුවේ අධ්‍යක්‍ෂ ධුරයට පත්වුයේ පී.ඒ.ජයන්තා මහත්මියයි.

එතුමියගේ ධුර කාලයේදී බස්නාහිර පළාත් සමාජ සේවා දෙපාර්තමේන්තු කාර්යාලය බත්තරමුල්ලේ, ඩෙන්සිල් කොබ්බෑකඩුව මාව‍තේ පිහිටි සභා ලේකම් කාර්යාලීය ගොඩනැගිල්ලට ගෙන එන ලදි. සමාජ සේවා ප්‍රඥප්ති සම්පාදනය කිරීම, රජයේ නිවර්තන නිවාසය, රජයේ විශේෂීත ළමා පුනරුත්ථාපන මධ්‍යස්ථානය, රජයේ වැඩිහිටි නිවාසය, රජයේ විශේෂීත ළමා (පිරිමි) පුනරුත්ථාපන මධ්‍යස්ථානය සඳහා අධිකාරීවරුන් බදවා ගැනීමට විවෘත තරඟ විභාගයක් පැවැත්වීම. සමාජ සේවා නිලධාරීන් මාණ්ඩලික නිලධාරීන් ලෙස ලිඛිතව තහවුරු කර ප්‍රාදේශිය ලේකම් කාර්යාල වලට දැනුම්දීම ආදී සිදු කරන ලද්දේ ඒ කාලයේය.

මේ සඳහා එවකට පළාත් සමාජ සේවා ගරු අමාත්‍ය මහේෂ් අල්මේදා මැතිතුමාගේ සහ අමාත්‍යංශ ලේකම් මල්සිරි ජේ. සෙනවිරත්න මහත්මියගේ මෙන්ම පළාත් රාජ්‍ය සේවා කොමිසන් සභාවේ ගරු ලේකම් ඩී.ආර් සුභසිංහ මහත්මිය ගේ පූර්ණ දායකත්වයක් ලබාදී ඇත. කළුතර දිස්ත්‍රික්කයේ ඇතිවූ ගංවතුරින් අවතැන් වූ ජනතාවට සමාජ සේවා දෙපාර්මේන්තුව සේවා කටයුතු සිදු කිරීම, 2004 වර්ෂයේ සුනාමි ව්‍යවසනය සඳහා බස්නාහිර පළාත් සමාජ සේවා දෙපාර්තමේන්තුවේ විශේෂ සහයෝගය ලබාදීම, විශේෂිත ආධාර, විශේෂ ශල්‍යකර්ම සඳහා ආධාර ලබාදීම ආදිය බස්නාහිර පළාත් සමාජ සේවා ගරු අමාත්‍ය ප්‍රසන්න රණතුංග මැතිතුමාගේ විශේෂ අවධානය යටතේ බස්නාහිර පළාත් සමාජ සේවා දෙපාර්තමේන්තුව සිදුකරන ලදී.

2007 සැප්තැම්බර් මාසයේ සිට ආචාර්ය ගාමිනී කාරියවසම් මහතා බස්නාහිර පළාත් සමාජ සේවා දෙපාර්තමේන්තුවේ අධ්‍යක්‍ෂ ධුරයට පත් විය. කලා කාමීත්වයට මුල් තැන දෙමින්  වැඩිහිටි ගීතය සහ වැඩිහිටි කොඩිය නිර්මාණය කිරීම ආදී කටයුතු එතුමාගේ ධුරකාලයේදී සිදුකරන ලදි. එමෙන්ම නිරිතාබීමානී, සුවඳ පද්ම ආදී කෘතිද එතුමා සම්පාදනය කළේය. වසර 2ක් වැනි කාලයක් අධ්‍යක්‍ෂ ධූරය හෙබවූ එතුමා විශ්‍රාම ගිය පසු එවකට සමාජ සේවා සහකාර අධ්‍යක්‍ෂ ලෙස කටයුතු කළ එස්.අතපත්තු මහතා වැඩබලන අධ්‍යක්‍ෂ ධූරයට පත්විය.

ඉන්පසු 2010.02.01 දින ක්‍රිෂාන්ති කාරියවසම් මහත්මිය අධ්‍යක්‍ෂ ධූරය  මාස කිහිපයක් දැරුවාය.

අනතුරුව 2010.06.23 වන දින අනූෂා ගෝකුළ ප්‍රනාන්දු මහත්මිය අධ්‍යක්‍ෂ ධූරයට පත්වීමෙන් පසු 2011.03.09 දින සිට සමාජ සේවා දෙපාර්තමේන්තුව 229, දෙපානම, පන්නිපිටිය යන ස්ථානයේ ස්ථාපිත කරන ලදි. සමාජ සත්කාරක වැඩසටහන්, අවාසි සහගත පුද්ගලයන්ට ප්‍රජා සහභාගීත්වයෙන් නිවාස ගොඩනැගීම, ප්‍රජා දායකත්වයෙන් රටේ සංවර්ධනය ඇතිකිරීම සඳහා සුව සෙවන, අතහිත, අසරණ සරණ, වැන්දඹු දිරිය මාතා, දූ පුතු මා පිය සරණ, රන් ඳා බිඳු, අපේ සොඳුරු පවුල යන ව්‍යාපෘති ඇතුලත් සමාජ සත්කාරක සතිය හා විශේෂ අවශ්‍යතා සහිත වූවන්ගේ ක්‍රීඩා උළෙල, සංස්කෘතික උළෙල හා වැඩිහිටි දින වෙනුවෙන් වැඩිහිටි සංස්කෘතික තරඟාවලිය ආදී වැඩසටහන් එතුමියගේ ධුර කාලයේදී ආරම්භ කරන ලදි.

ගණකාධිකාරී තනතුරක් අනුමත කර ගෙන බඳවා ගැනීම, සංවර්ධන සහකාර / උපාධිධාරී අභ්‍යාසලාභීන් බඳවා ගෙන ප්‍රාදේශීය ලේකම් කාර්යාල වලට අනුයුක්ත කිරීම, සමාජ සේවා නිළධාරීන්ට යතුරු පැදි ලබා දීම, සමීක්‍ෂණ, පර්යේෂණ, සමාජ කතිකාවත, අපි සඟරාව, මාධ්‍ය සඟරාව, වෙබ් අඩවි, විද්‍යුත් තැපෑල, ෆේස්බුක්, නව තාක්‍ෂණික ක්‍රමවේදයන් භාවිතය වැඩි දියුණු කිරීම, සමාජ සේවා නිළධාරීන්ගේ පෞද්ගලික ලිපි ගොනු ප්‍රාදේශීය ලේකම් කාර්යාලවලින් ගෙන්වා ගැනීම, සමාජ සේවා තේමා ගීතය රූගත කිරීම, ගාථා, උපදේශන, අත් පත්‍රිකා, කැසට් තැටි ආදිය බෙදා හැරීම, චක්‍රලේඛ සම්පාදනය, බස්නාහිර පළාත තුළ වැඩිහිටි දිස්ත්‍රික්, පළාත් බල මණ්ඩල ස්ථාපිත කිරීම, පරිවාස හා සමාජ සේවා බස්නාහිර පළාත් ගරු අමාත්‍ය ජගත් අංගගේ මැතිතුමාගේ පූර්ණ දායකත්වය යටතේ සිදුකරන ලදි.

ඉන්පසු 2013.05.09 දින නව බස්නාහිර පළාත් සමාජ සේවා අධ්‍යක්‍ෂ ලෙස බී.එච්.සී.ශිරෝමාලි මහත්මිය පත්වූ අතර එතුමියගේ, ධුර කාලයෙදි ආබාධිත දරුවන් වේනුවේන් මතුගම මයුර ළමා මාර්ගෝපදේශන මධ්‍යස්ථානය ආරම්භ කිරිමේ කටයුතු සිදුකරන ලදි. එතුමියගේ ධුර කාලයෙදි වැඩිහිටි සුබ සාධන සේවා මධ්‍යස්ථාන ඉදිකිරිමට ද යෝජනා කරන ලදී.

2017.08.01 දින බස්නාහිර පළාත් සමාජ සේවා අධ්‍යක්ෂ වශයෙන් වජිරා දමයන්ති මිය පත් වුවාය, බස්නාහිර පළාත් සමාජ සේවා දෙපාර්තමේන්තුව බස්නාහිර පළාත් නව කාර්යාල සංකිර්ණයේ 2018.06.06 දින ස්ථාපිත කිරිම පළාත් සමාජ සේවා අධ්‍යක්ෂ වජිරා දමයන්ති මහත්මිය ගේ ධුර කාලයේදි සිදු කරන ලදි. දෙපාර්තමේන්තු නිල නිවාස කමිටුව පිහිටුවිම සිදු කරන ලද්දේ එතුමියගේ ධුර කාලයේය.

2018.10.20 දින පළාත් සමාජ සේවා අධ්‍යක්ෂ ධුරයට පත් වු ඒ.තමරිකා හර්ෂණි මහත්මිය 2019 ජුනි 24 දින දක්වා පළාත් සමාජ සේවා අධ්‍යක්ෂ ධුරයේ රාජකාරි කටයුතු කළාය.

2019 ජුනි 24 දින වත්මන් පළාත් සමාජ සේවා අධ්‍යක්ෂ වන චන්දිමා දිසානායක මහත්මිය සමාජ සේවා අධ්‍යක්ෂ ධුරයට පත්වුවාය. එතුමියගේ කාලයේ නෙළුම්පොකුණ ජාත්‍යන්තර රඟහලේදි වැඩිහිටියන් 1100ක ගේ සහභාගිත්වයෙන් හා ගරු බස්නාහිර පළාත් ආණ්ඩුකාර මුසම්මිල් මැතිතුමාගේ හා ආරාධනයෙන් ආරාධිත අමුත්තන් රැසකගේ ප්‍රධානත්වයෙන් වැඩිහිටි දිනය උත්කර්ෂවත්ව පවත්වන ලදි. පළාත් වැඩිහිටි බලමණ්ඩල රැසක සාමාජිකයන් එකම වේදිකාවක එකම ගිතයකට ප්‍රාසාංගිකව නර්තනයේ ගායනයේ හා වාදනයේ යෙදවීම එතුමියගේ කාලයේ සිදුකළ විශේෂ වෙනසකි.

ආබාධිත දරුවන් වෙනුවෙන් ආබාධිත දින උත්සවය සංවිධානය කර ගරු ආණ්ඩුකාර සීතා අරඹේපොල මහත්මියගේ ප්‍රධානත්වයෙන් පවත්වා ත්‍යාග ප්‍රද්‍රනය කිරිම නව රංග ශාලාවේදී සිදු කරන ලදි.

ප්‍රවීන ගීත රචක රඹුකන සිද්ධාර්ථ හිමියන්ගේ හා මහින්ද චන්ද්‍රෙස්කර මහතාගේ සම්පත්දායකත්වය ලබාගෙන බස්නාහිර පළාතේ වැඩිහිටි බලමණ්ඩල වෙනුවෙන් ආතති කළමනාකරණය සඳහා රසවින්දනාත්මක වැඩසටහන් සංවිධානය කිරිම බස්නාහිර පළාත් සමාජ සේවා අධ්‍යක්ෂ චන්දිමා දිසානයක මහත්මියගේ සංකල්පයක් අනුව ක්‍රියාත්මක කරන ලදි.

කාර්ය මණ්ඩලයේ අත්දැකිම් හුවමාරුව සඳහා රුහුණු රිදියගම නිවර්තන නිවාසය නැරඹීම සඳහා ක්ෂේත්‍ර චාරිකාවක් සංවිධානය කිරීමද, උතුරු පළාත් සභාවේ සමාජ සේවා දෙපාර්තමේන්තුවේ නිලධාරීන්ගේ අධ්‍යාපන චාරිකාවට පහසුකම් සැලසීමද එතුමියගේ ධුර කාලයේ සිදුකරන ලදි.

ගංගොඩවිල රජයේ නිවර්තන නිවාසයේ හා බෙල්ලන්තර රජයේ විශේෂීත ළමා පුනරුත්තාපන මධ්‍යස්ථානයේ කාර්ය මණ්ඩලය සඳහා ප්‍රථමාධාර වැඩසටහන් ප්‍රථම වරට ක්‍රියාත්මක කරන ලද්දේ එතුමියගේ කාලයේය එසේම පෞරුෂත්ව පුහුණුව පාඨමාලා පැවැත්විමද, ආකල්ප වර්ධන වැඩමුළු පැවැත්වීමද සිදුකරන ලදි.

ගංගොඩවිල රජයේ නිවර්තන නිවාසය, බෙල්ලන්තර රජයේ විශේෂීත ළමා පුනරුත්තාපන මධ්‍යස්ථානය, මිරීගම රජයේ වැඩිහිටි නිවාසය සහ මිරීගම රජයේ විශේෂිත පිරිමි ළමා පුනරුත්ථාපන මධ්‍යස්ථානය ආයතන හතරේ නේවාසිකයින්ට වර්ෂයට අවශ්‍ය ඇඳුම් පැලඳුම්, සෙරප්පු, ඇඳ රෙදි ආදිය හා ආයතන හතරට අවශ්‍ය භාණ්ඩ හා උපකරණ සැපයිම, පුහුණුව ලබා දීම, කාර්ය මණ්ඩලයේ නිලධාරින් යොදවා නේවාසිකයින්ට පුහුණු කිරිම ඇරඹීම ආදියද චන්දිමා දිසානයක මහත්මිය සිදු කළ විශේෂ කාර්තව්‍යයන්ය.

ක්ෂය රෝගාධාර දිමනාව රුපියල් 1000 සිට රුපියල් 3000 දක්වා වැඩි කිරිමට අනුමැතිය ලබා ගැනිමද එතුමිය විසින් සිදු කරන ලදි.

මීරිගම හා කොළඹ වැඩිහිටි දිවා සුබසාධන මධ්‍යස්ථාන වලට කාර්යභාර නිලධාරින් පත් කිරිමටද, ආයතන අධික්ෂණයට සහකාර අධ්‍යක්ෂ හා පරිපාලන නිලධාරිගේ ප්‍රධානත්වයෙන් කමිටු පත් කිරීමද එතුමිය තිරණය කළාය.

ලිපි ශීර්ෂ නවිකරණය කිරිම හා 2012 වර්ෂයේ ආරම්භ කළ මහජනාධාර කාඩ්පතෙහි පළාත් රාඡ්‍ය ලාංජනය යොදා අක්ෂර වෙනස් කිරීම කහ වර්ණයකින් කාඩ්පත මුද්‍රණය කිරීම සිදු කරන ලද්දේ එතුමිය විසිනි.

සුසේවාභිමානී සම්මාන උ‍ළලේ සම්මාන ප්‍රමාණය සීමා කර සුවිශේෂී පුද්ගලයන් පස් දෙනකුට පමණක් සම්මාන පිරිනැමීමට තීරණය කරන ලද්දේ එතුමිය විසිනී.

සියළුම අංශවල ලිපිගොනු ක්‍රමවේදය විධිමත් කිරිම හා රාජකාරි කටයුතු කාර්යක්ෂම කිරීමට පියවර ගැනිමද සිදුකරන ලදී.

ගංගොඩවිල රජයේ නිවර්තන නිවාසය සන්ෆ්ලවර් විලේජ්හි ස්ථාපිත කිරීම සඳහා ප්‍රධාන සැලැස්ම සකස් කිරීම හා රජයේ නිවර්තන නිවාසය සන්ෆලවර් විලේජ්හි ස්ථාපිත කිරීමට අවශ්‍ය මුලික කටයුතු ආරම්භ කිරීමත් සන්ෆ්ලවර් විලේජ්හි ඉඩමේ අයිතිය බස්නාහිර පළාත් සමාජ දෙපාර්තමේන්තුවට ලබාගැනීමත්, මිරීගම රජයේ වැඩිහිටි නිවාසයේ ඉඩමේ භුක්තිය සහ මිරීගම රජයේ විශේෂිත පිරිමි ළමා පුනරුත්ථාපන මධ්‍යස්ථානයේ ඉඩමේ භුක්තිය බස්නාහිර පළාත් සමාජ දෙපාර්තමේන්තුවට ලබාගැනීමත් එතුමිය විසින් සිදුකරන ලදී.

නිල ඇදුම් දිමනා, රෝගාධාර හා රුධිර කාන්දුකරණ ආධාර ආදිය සඳහා විධිමත් අනුමැතියකින් ලබා ගැනීමටද  එතුමිය විසින් කටයුතු සම්පාදනය කර ඇත.

රජයේ වාහන භාවිතය, මිලදී ගැනුම් විධිමත් කිරීම, චක්‍ර‍ලේඛ හා ආයතන සංග්‍රහය ප්‍රකාරව ගෙවිම් කටයුතු කිරීමට කාර්ය මණ්ඩලය හුරු කිරීම ආදිය ද සිදුකරමින් පවතී.

සමාජ සේවා නිලධාරින්ට රුපියල් 2000 දුරකථන දිමනාවට අනුමැතිය ලබා ගැනිම, ගමන් මල්ලක් ලබාදිමට අනුමැතිය ලබා ගැනීම, ගමන් වියදම් දිමනා වැඩිකර දිමට අනුමැතිය ගැනිම හා ආයතන කාර්යමණ්ඩලයට විධිමත් ගමන් වියදම් දිමනා අනුමත කරවා ගැනිම චන්දිමා දිසානයක මහත්මිය විසින් කාර්යමණ්ඩලයට දුන් ප්‍රතිලාභවේ.

වැඩිහිටි ප්‍රජාවගේ සුබසාධනය වෙනුවෙන් ඉදිකරන ලද සුබ සාධන සේවා මධ්‍යස්ථාන වන  කොළඹ දිස්ත්‍රික් වැඩිහිටි සුබසාධන හා සම්පත් මධ්‍යස්ථානය ගරු ආණ්ඩුකාර සීතා අරඹේපොල මහත්මියගේ ප්‍රධානත්වයෙන් පොල්වත්තේ ද, ශ්‍රී ලංකාවේ ප්‍රථම ක්‍රියාත්මක රජයේ සුබ සාධන මධ්‍යස්ථානය වන මීරීගම වැඩිහිටි සුබසාධන සේවා මධ්‍යස්ථානය ගරු ආණ්ඩුකාරවර රොෂාන් ගුණතිලක මැතිතුමාගේ ප්‍රධානත්වයෙන් මීරිගමදී ද විවෘත කළ අතර, කළුතර ද වැඩිහිටි සුබසාධන සේවා මධ්‍යස්ථානයක් විවෘත කිරීමට කටයුතු යොදා ඇත.

එමෙන්ම ආබාධිත ළමා පුහුණු මධ්‍යස්ථානය නුදුරු දිනයකදි  මීරීගම විවෘත කිරිමට කටයුතු යොදා ඇත. කොවිඩ් 19 වසංගත තත්වය පාලනය කිරිමේ කර්තව්‍ය සඳහා බස්නාහිර පළාත් සමාජ සේවා දෙපාර්තමේන්තුව සෘජු දායකත්වය ලබාදී තිබේ.කොවිඩ් 19 වසංගත තත්වය පාලනය කිරිමට රජයේ නිවාස හතරෙම නේවාසිකයන් හා කාර්ය මණ්ඩලය ආරක්ෂා කර ගැනීම සඳහා එතුමිය සියළුම අවශ්‍යතා සපුරා දෙමින් හා ආයතන සම්බන්ධිකරණය කරමින්  ඉමහත් වෙහෙසක් දැරුවාය. 2021 නොවැම්බර් මස 11 වන දින නව පළාත් සමාජ සේවා අධ්‍යක්ෂ ලෙස සෙව්වන්දි හෙට්ටිආරච්චි මහත්මිය පළාත් සමාජ සේවා අධ්‍යක්ෂ ධුරයට පත්වුවාය. අවාසි සහගත ප්‍රජාව වෙනුවෙන් බස්නාහිර පළාත් සමාජ සේවා දෙපාර්තමේන්තුව විශාල වැඩකොටසක් ඉටු කරමින් සිටී.